ལོ་ཆུང་སེམས་པའི་འགྱུར་ལྡོག  །ནམ་ཟླ་དཔྱིད་ཁའི་གནམ་ངོ༌།  །ཚིག་གསུམ་དམ་བཅའི་རི་མོ།  །གོམ་གསུམ་བར་ནས་བརྗེད་འགྲོ། །
བརྩེ་དུང་སེར་བུའི་རིལ་བུ།  །རྟག་འཛིན་འཆིང་བར་བཅངས་ཀྱང༌།  །ཕྱི་ཐག་དྲོད་ཀྱིས་རེག་ཚེ།  །ཅང་མེད་ཆུ་རུ་འགྱུར་འགྲོ། །
ཡལ་རྒྱུ་མེད་པའི་འཛུམ་མདངས།  །གཏན་དུ་ཞེ་ལ་བཀོད་ཀྱང༌།  །སྨིན་མ་བསྡུས་པའི་ཁྲོ་གཉེར།  །ཟླ་གསུམ་གོང་ནས་མཐོང་འོང༌། །
དུང་སེམས་ཕབ་ཀྱིས་བསྙལ་བའི།  །འཛུམ་དཀར་རྒུན་ཆང་མངར་མོ།  །ཞིམ་ཡང་བཟི་ཁ་བཙན་པས།  །ཨ་ཇོས་ཆུན་ས་མ་རེད། །
དྭངས་བསིལ་ཆུ་བོའི་ངོགས་ནས།  །མི་སྡོད་ལོ་ཟླས་རྙིང་བའི།  །རང་གི་བཞིན་རས་མཐོང་བས།  །ཕུགས་འདུན་ལྷ་ཆོས་དྲན་བྱུང༌། །