|
དུང་སེམས་བདུད་རྩིའི་ཟིལ་བ་ཆགས་པའི། །
གངས་དཀར་མེ་ཏོག་འདབ་མའི་ངོགས་ནས། །
ལང་ཚོའི་མྱུ་གུ་དལ་གྱིས་འབུས་པ། །
བུ་གཅིག་མཚོ་བྱུང་འཛུམ་པའི་མེ་ཏོག །
ལྷོ་ཕྱོགས་རྒྱ་མཚོའི་རླབས་ཀྱི་ངོགས་སུ། །
ལས་ཀྱི་རླུང་གི་རྗེས་སུ་བསྐྱོད་དེ། །
ངག་རིག་མགྲིན་པའི་རྫ་རྔ་རྡུང་བཞིན། །
བག་ཡངས་ངང་ནས་ལྟད་མོར་རྒྱུ་འོ། །
ལྗང་མདོག་ཏཱ་ལའི་ནགས་ཚལ་རྒྱས་པའི། །
གཡུ་ཡི་འཇིག་རྟེན་ཞིང་གི་དུམ་བུ། །
མཛེས་སྡུག་གླིང་ཕྲན་གྲུ་ཟུར་ཞིག་ནས། །
སྔོ་བསངས་ཡངས་པའི་ཆུ་གཏེར་མཐོང་བྱུང༌། །
གནམ་སྔོན་ཞུན་མ་དབྱིག་འཛིན་ལྟོ་བར། །
འཁྱིལ་བ་འདྲ་ཞེས་སྙན་ངག་རྒྱན་གྱིས། །
རབ་བཏགས་མིན་པའི་མཐིང་མདོག་རྒྱ་མཚོ། །
ཀྱེ་མ་འདི་ན་དངོས་སུ་སྣང་ངོ༌། །
ལྷ་ཡུལ་ལྷ་ཡི་རྗེས་ཆགས་འདྲེན་བྱེད། །
ཟུམ་པ་མེད་པར་སྟོང་ཕྲག་བགྲང་བྱའི། །
དུས་ཀྱི་ཁྱུད་མོར་གཡོ་མེད་གཏད་པའི། །
ཡིད་ཀྱི་རྒྱ་མཚོ་ཁྱོད་རང་ཡིན་ནམ། །
མི་ཡུལ་ཚེ་སྲོག་ཐོག་མའི་འབྱུང་ཁུངས། །
གདོད་མའི་རྒྱ་མཚོར་གྲགས་པའི་མཚན་སྙན། །
ཚན་རིག་མཁན་པོས་རབ་བཏགས་མིན་ན། །
བདག་ཀྱང་ཁྱོད་ཀྱི་བུ་རྒྱུད་མིན་ནམ། །
ཡཱ་ལོང་ཝན་གྱི་བྱེ་མའི་སྟེང་དུ། །
རྐང་རྗེས་གསར་བའི་རི་མོ་ཕབ་སྟེ། །
འབྲོས་དེད་ཚུལ་གྱིས་རླབས་དང་བརྩེས་ནས། །
དང་མའི་སེམས་ཀྱི་བྲོ་བ་མྱང་འདོད། །
ལྕིད་ཀྱིས་ནོན་པའི་རླབས་སྒྲ་རེ་རེ། །
རྣ་ལམ་བརྟོལ་ནས་ཡིད་ལ་ལྷུང་སྟེ། །
ཚིག་གིས་མི་མཚོན་འབྱུང་བའི་རང་གདངས། །
དེ་རིང་འདི་ན་ཅི་དགར་མྱོང་སྣང༌། །
རླབས་ཀྱི་ཟེགས་མ་དལ་གྱིས་ལེན་པའི། །
ཐེན་ཡཱ་ཧྭེ་ཅོའི་གོར་མའི་འགྲམ་ནས། །
མཚོ་མཐའ་མཁའ་ལ་འདྲེས་པའི་མཚམས་སུ། །
མ་བཅོས་སེམས་ཀྱི་གསང་བ་འཚོལ་སྐད། །
ཁ་ན་རླབས་ཕྲེང་གྱ་གྱུར་རྩེ་ཡང༌། །
གཏིང་ན་ལྷོད་ཀྱིས་ལྟེམ་མེར་ཆགས་པ། །
རང་བྱུང་འབྱུང་བའི་གནས་ལུགས་འདི་ཡིས། །
ནང་ཚུལ་གཤིས་ཀྱི་དེ་ཉིད་མཚོན་ནོ། །
མཐོ་བ་གངས་དཀར་སྟོད་ཀྱི་ནམ་མཁའ། །
དམའ་བ་ས་གཞིའི་འདབས་ཀྱི་རྒྱ་མཚོ། །
ཡུལ་གྱིས་བསྐལ་ཡང་ངོ་བོའི་སྒོ་ནས། །
སོ་སོར་འབྱེད་པའི་སྤུ་རིས་མ་དམིགས། །
ལྟ་བའི་མིག་གི་རྒྱང་ཐག་ཆད་ཅིང༌། །
དྲན་པའི་སེམས་ཀྱི་དཔྱང་ཐག་ཆད་མོད། །
ཁྱོད་ལས་ཐོབ་པའི་ནང་གི་ཚོར་བ། །
སྐྱོ་བ་སངས་བའི་ཡིད་ཀྱི་བདུད་རྩི། །
འཇུར་བུའི་བློ་ཡིས་གུད་དུ་མ་བཅད། །
གུ་ཡངས་ངང་དུ་ཕྱམ་གྱིས་གློད་སྐབས། །
འཁོས་ཆུང་མི་ཚེའི་སེམས་ཀྱི་གསང་བ། །
མཐའ་མེད་རྒྱ་མཚོ་ཁྱོད་ལ་ཤོར་སོང༌། །
ཁྲི་གདུགས་ཉི་མས་ཕྱི་མིག་བལྟས་ཏེ། །
རྒྱང་རིང་ནུབ་ཁའི་དམར་འོད་ངོགས་ནས། །
མཇུག་མཐའི་དྲོད་ཁོལ་སྙིང་ལ་སྦྱིན་པ། །
ཐག་རིང་མགྲོན་པོའི་སེམས་གསོ་ལོས་ཡིན། །
ལ་འུར་དྭངས་ཤེལ་པར་ཆས་ཐོགས་ཏེ། །
ང་དང་རྒྱ་མཚོའི་རླབས་ཀྱི་གཟུགས་བརྙན། །
རིན་ཆེན་བྱེ་མ་བརྡལ་བའི་འགྲམ་ནས། །
རྒྱང་བཞུད་དྲན་པའི་རྟེན་དུ་འཇོག་འདོད། །
དཀར་གསལ་ཟླ་བ་མཁའ་ལ་ཤར་སོང༌། །
ཟླ་འོད་འོག་གི་རྒྱ་མཚོའི་བསིལ་ངད། །
ས་མཐའི་འཁྱམ་པོའི་སེམས་ཁོང་དབུས་སུ། །
སིབ་སིབ་ཐིམས་པའི་ཚོར་བ་བརྗེད་དཀའ། །
ཤར་ཕྱོགས་མཁའ་མཐའི་མཚམས་སྤྲིན་བར་ནས། །
སང་ཉིན་ཞོགས་པའི་ཉི་རྩེའི་འོད་ཟེར། །
གཡོར་གྲུའི་བ་དན་རྩེ་ལ་འཁྱུད་དུས། །
གྱེས་ཁའི་མིག་གིས་ཁྱོད་ལ་ལྟ་དགོས། །
གྲྭ་རྐྱང་ང་ནི་བར་སྣང་རླུང་པོ། །
གནས་གཅིག་དག་ཏུ་སྡོད་པ་མེད་པར། །
ཕྱོགས་ཀྱི་ཐ་གྲུ་ལྗོངས་ནས་ལྗོངས་སུ། །
རྒྱུ་ཞིང་འགྲོ་བ་རང་གི་ངང་ཚུལ། །
བྲེལ་བའི་ལོ་ཟླས་རྒྱང་དུ་བསྐྱུར་ཏེ། །
རྒྱལ་ཁམས་ཉུལ་བའི་ལྡོམ་བུའི་རྐང་རྗེས། །
ལྷོ་ཕྱོགས་མཚོ་ཁའི་བྱེ་མར་བཀོད་འདི། །
ཐ་མ་མིན་པའི་ཁ་ཚོན་སུས་ཆོད། །
ཚུལ་དེ་བསམ་ཞིང་ལྗོངས་རྒྱུའི་མྱོང་བྱང༌། །
མི་བརྗེད་སྙིང་གི་དྲན་པའི་རྟེན་དུ། །
རྟོག་འགྱུའི་སྣང་ཤས་རྨྱུ་གུའི་རྩེ་རུ། །
འགོག་པ་མེད་པར་ཐོལ་གྱིས་བབས་སོང༌། །
ཧྭེ་ནན་གླིང་ཕྲན་གྱི་སན་ཡཱའི་མཚོ་འགྲམ་ནས་༢༠༠༢ལོའི་ཟླ་ཚེས་ལ། | 
