སྔོ་བསངས་ལྷ་ལམ་བཻ་ཌཱུར་མདངས་ཀྱིས་མཛེས། །
དཀར་གསལ་ཟླ་བས་དུང་གི་འོད་དཀར་སྤྲོ། །
ལྗོན་ཤིང་ཡལ་ག་འབྲས་བུའི་ཁུར་ལྡན་པའི། །
ནམ་ཟླ་སྟོན་གྱི་རྒྱལ་མོ་དེ་རིང་མཐོང༌། །

འོན་ཀྱང་བཀྲག་དར་དབྱར་གསུམ་ལང་ཚོའི་དཔལ། །
ལྷ་ཡུལ་ས་ལ་འཕོས་འདྲའི་དུས་སྟོན་དེ། །
ཡུད་ཀྱིས་འདས་ཚུལ་བསམ་ཚེ་བདག་གི་སེམས། །
འདུ་འབྲལ་སྣང་ཤས་ཁྲོད་ན་ལྷག་པར་སྐྱོ། །

ཆུ་སྐྱེས་སྐྲ་ལོ་སད་དཀར་རེག་པས་ཟིན། །
གཡུ་མདོག་རྩྭ་ལྗང་གྲང་རེག་ནད་ཀྱིས་ཐེབས། །
ལྕུག་ཕྲན་འདབ་ལོ་སྟོན་སེར་ངད་ཀྱིས་རྙིང༌། །
སྨན་སྤོས་བསུང་ཞིམ་ལྷགས་པས་སྣང་མེད་འགམས། །

ལྷ་གླང་དམར་པོའི་སྣ་ཞགས་དུམ་བུར་ཆད། །
ལུག་རུ་སེར་པོའི་རྭ་ཅོ་འཕྲེད་དུ་ཉལ། །
ཁྱུང་ལྡེར་སྨུག་པོའི་སྤར་མོ་གདེངས་པའི་ཁ། །
རྩི་ལྗོན་སྐྱེ་སྟོབས་ཟ་ལ་རྔམ་པ་བཞིན། །

ཕྱོགས་ཀྱི་ལྷས་ཐང་ཡུག་པོའི་ཟེ་བ་ཡི། །
སྤུ་ལོང་རྒྱས་ཤིང་རླབས་ཀྱི་རི་མོ་འགྱུ། །
དམར་མདངས་རྒྱས་པའི་རྩི་ཤིང་ཕོན་པོ་དག །
རྒྱང་རིང་རི་བོའི་མགུལ་ན་ཚོམ་བུར་ཆགས། །

ཆུ་བོའི་འགྲམ་ན་སྟར་བུའི་ཤིང་ཚལ་གྱིས། །
ནངས་མ་རེ་བཞིན་བད་དཀར་གོས་སུ་གྱོན། །
རི་བོའི་ངོགས་ན་སྤང་རྒྱན་མེ་ཏོག་གིས། །
ཁ་ཆར་འདྲེས་མའི་བཏུང་བ་ཡང་ཡང་འཐུང༌། །

ལྷིང་འཇགས་ཁོར་ཡུག་འཇག་མའི་བཤུག་གླུས་དཀྲོགས། །
དྲོ་འཇམ་ཉི་འོད་སེར་མ་རླུང་གིས་ཟོས། །
གསེར་མདོག་འདབ་ལོ་སྡོང་པོའི་རྩེ་ནས་ལྷུང༌། །
ཨ་སྤུ་བྱེའུ་སྤུ་རྐང་སེན་ངོགས་ནས་འཕུར། །

ཟིལ་དངར་སྟོང་པའི་གེ་སར་འདབ་རོ་ཡིས། །
སྟོན་མཇུག་སྦྲང་བུའི་སེམས་ལ་སྙིང་རླུང་བསླངས། །
སྲབ་འཇམ་གཤོག་པ་གཡོ་བའི་ཟ་ཟིར་སྒྲས། །
འདས་དོན་དྲན་པའི་སྐྱོ་གླུ་ཅིར་ཡང་ལེན། །

འདབ་ལྡན་ཁུ་བྱུག་མོན་གྱི་ཡུལ་ལ་ཆས། །
ལྷ་བྱ་ཁྲུང་ཁྲུང་ལྷོ་མཐའི་མཁའ་ལ་བསྙེག །
ངང་བའི་བུ་མོ་ནུབ་ཁའི་རི་ལ་ཐེག །
སྟག་ཆུང་རྐང་དྲུག་ཕྱི་མའི་འཕྲང་ལ་འགྲིམ། །

དགུ་ཚིགས་ཁྲོད་ནས་ནམ་གུང་མཁའ་ལམ་མཐོང༌། །
རྒྱུ་སྐར་ཁྲ་མོའི་རང་འོད་ལྷག་པར་འཚེར། །
ཐུན་གསུམ་མཚན་མོའི་དུས་ཡུན་ལོ་ལས་རིང༌། །
སྐྱ་རེངས་དང་པོའི་རེ་སྒུག་མཐའ་ལ་བསྲིངས། །

ཀྱེ་མ་སྟོན་དུས་སྐྱོ་སྣང་ཆེ་ན་ཡང༌། །
སེམས་གསོའི་སྐྱོ་གྲོགས་སྙན་ངག་མིག་ཡངས་མའི། །
ཉམས་དང་འགྱུར་བའི་གཞས་ཆུང་སྙན་པོ་འདིས། །
སྙིང་གི་གདུང་བ་ཁད་ཀྱིས་སོས་པར་བྱས། །

ཤིང་སྤྲེལ་ལོའི་ཟླ་༧ཚེས་༣ལ།